Jejuluk / Gelar

Tuju Jejuluk

Tuju jejuluk tu dikena ngaga gegelar tauka nama dikena ngangauka orang ngambika iya teperansang ati ngereja pengawa enti lebuh jejuluk iya disebut. Jejuluk tu bisi bekaul enggau pengawa sereta perangai orang ke empu iya.

1. Lang Ngindang Menaul Tuntung nyawa deduka rerais manjung manggum senanggung ulu ilang, Lai Nyakai Menaul Banda maika kitai leka buah kenang, Raja Nata penyimpan pesaka dalam gudang.

2. Segunggang Daun SabangUlup Menyalin Benang, laja layar pematang,Raja Nyaduh orang ke puh mandi di tengkujuh panchur hari.Temenggung Judan tinggi penepan penyimpan seruan dalam ati.

3. Bujang sigat udu mereti, landik bejaku pandai betusi berandau enggau ginti indu bantang.Rengga bedilah santa bepanga dua bepampang, landik bejaku pandai berambai jaku kenang.

4. Mabung Panggau anak arau Keling belelang. Mabung sigat ngembuan penemu nadai ke timpang. Mabung Panggai landik becherita pandai beensera ngembuan batu tusut bebalut mesai kajang.

5. Bujang Lembau, tau betiu landik bekebutau ulih ngupah enggau leka pelaga mau gempanang. Raja natu ngembuan penemu penuh tibang.Dato Intai kurang bejaku landik   nurai di kirai keretas labang.

6. Laja Lelingga tinggi, sukat baruh merabung kajang. Orang laki sidi di jari tunjuk butang, landik merindang ngelantang ke ati orang ke beraie merampau ngenang.Datu siku siru   bejaku ngembuan ati sinu mesai tungku Indai Abang

7. Sentuku Buban ngembuan perugan pugu penemu. Bujang Abang Menyalu pandai bedungai landik belagu ngembuan tanduk ulat bulu mesai pugu pun kelindang. Raja Tuai landik megai ngempung orang.

8. Bujang mit ngembuan runding nyaing udu lasit ari sumpit betibang tulang. Bujang Mangging pendiau imun runggu ensing landik nyeling endun kumang.Keling kenu bujang runggu enti bejaku enda gegampang.

9. Sinja Emperaja nyengkung, duku besi andung pemumpung rekung pengeluntang bukang.Orang laki modern kemaya hari landik macha dunya ngena rawang tum indu benda, tajau besai mua ngembuan peduman ayam jari.

10. Bujang Imun jarang ketawa semampai ketuchum, ngelalaika mau mas badas igi gempanang. Bujang merti ngembuan sagam ati pandai macha genera runding orang.

11. Daun limba limbi, bujang senang linggang nengeri. Terebai tinggi ngelambung kebung langit ngeruang.Sebau kemarau hari,Bujang Linggang nengeri rajin ati nadai bepampang.

12. Lelayang Rangkang mandi di lenggang pasang Miri. Burung Among ngembuan puchung pengelandik jari. Radin Sanjau pandai ngilau ngelala genera dalam ati.

13. Kumang Ranjing ngembuan ruding peti menyanyi. Kumang ranchak Dara biak pengakak nembiak rebak dudi. Dara Racha tampak mua baka senaya bulan pegari

14. Kumang Menchi pandai mali diri, sekali iya ngenggang nyadi kenyalang lai menari.Dayang Sambai Dara Lupai pandai di chunggai tunjuk jari

15. Dara Jelembai Kumang Jawai tampak temuai pulai hari. Dara nelap, Kumang Jinap landik ngubat penusah ati.Dayang Sato Dara Sinu landik bejaku pandai menyanyi.

16. Indu dara tampak mua baka senaya bulan pegari. Dara nganta tuchum ketawa nanya enggau sunga dabung gigi.Dayang Menti .Dara mereti tuchi ati sinu ke orang.

17. Dara mentaba hari, Indu pendai tampun puji pandai besanggai landik menanyi tukang      nengkebang , Ngembuan bungkan dalam ati, bisi kunchi pun rang. (kedua bali nama Dara Bagau jengau rekung, duduk deduga nyembah pengabang)

18. Bujang Linggang menua bisi telaga dalam ati. Batang pauh laba tumbuh di daluh telaga kunchi. Kedu Mali Lebu ngembuan perugu penemu bebeli.

19. Ulup Batu Lichin ngembuan tinchin jamin nengeri. Bujang Ilang Lengain pandai engkeramat di ujung jari. Menggu ngembuan penemu ict.

20. Tabang lamba, tapang bekumbai, ngembuan pugai jaya nengeri Bujang lamba pandai melandai munyi serunai kesuling hari.

21. Bujang sigat besi berani ngembuan terupung di kandang lempuang. Selanjat landik nyurat nulis surat sempekat undang-undang.

22. Kapal belayar di tasik dalam, tan ngelaban lelangan alun gelumbang. Bujang tegar udu penyikar, landik nurai terabai perang.

23. Kah tebelian wi, pugu tunggul kawi, nyadika sulat ulu tulang.Bujang Tangga Rirang tau bejaku pandai betusi nyeritaka ensera leka kenang.

24. Ketupung baik ngikik malam terang. Bujang lansik ngembuan terepung buluh lalang.Radin Sanjau ngembuan ilau terupung dagang.

25. Rembun Sempun Jejabung kempang ati ngeluntang bukang.Bujang mali rampung ngeruranka ati indu bantang.

26. Bujang Tatau enda sumbung maya bejaku ulih ngitung ngembuan rintung di baruh rang.Kuju anggai laju terebai ngentilang remang.

27. Bujang kering bisi ruding ujung dabung baruh rang. Bujang Regas baka upas kesulai tandang. Sabang api tan bejembi tengah padang.

28. Keling Nading Kerangan, Bujang Linggang Lelangan, mandi di ai pasang nyegang. Apai Balan Seribu ngembuan perugu batu pemandang.

29. Bujang Jentang Kemarau rintau-rintau nengan remang, Ulup Batu Lichau selalu madamka laya butang. Keling Kenu, aya jamu madamka jaku laya orang.

30. Dara Imun likun pendiau tuchum nyingkum semampai di galau nyadi ke tengau malam terang. Dara Samban pandai nyumanka litan ati orang.

31. Kumang Indai Abang ngembuan pemandang batu intan. Dara batu gula ngembuan jayau batu bulan. Endu dara Menti pengibun ati semua orang.Endu Dara Rimbu bejaku siru ngasuh lantang.

32. Apai Jangkam Bulan pengibun bungkan rumbang penemu. Mali bejaku ngibun gelema semua pengeraja Jaku Iban. Bujang Kuang Kebat jari bejeluti landik bejelingkat nusun pengawa naka penemban.

33. Bujang kering nyelangking kijang. Batu timah betatah bangkang. Berangai besai pengundan penemu nadai ke timpang.Apai Sala Muda alai nyanda smua barang.

34. Kumpang Pali ngembuan ati manah chukup tuchi. Ngembuan puchung pengelina ati sapa ke tusah nyadi lantang.Rengayung betulang lempung sedia nulung semua orang.

35. Runggu batu chandi, tau berujan puh bejembi di panas lelaki belah bedilang. Selikau ngembuan batu ilau kena nenggau menua orang.

36. Jelenggai datai ari bingkai bulan kembung, Jaroh datai ari tengkujuh panchur wong ngembuan puchung pandai berenung landik nimang.

37. Mechan ngemata ke bulan pegari terang. Mechi ngemataka hari tawas gegantang.Kumbu Rayung ngembuan puchung pengerawang ati.

38. Ipuh Kinying ngelabuh ka nyumbuh siti menua. Bujang tinggi ensuruk remang.

39. Bujang Linggang nengeri. Tutup temilah besi penyimpan laja atung pematang.

40. Lelunyit tampun puji, Singgai menyawai besi berani. Ngembuan ati mutus kempang ngansak nembiak nganaka ensera leka timang.

41. Remaung Panggai ngemataka penyurai pintu remang. Sanda negung ngemataka kibung indu bantang. Lumpong ngembuan puchung mali rampung pengelempung tulang. Raja Gelegat ngempung adat semua orang.

42. Tempan besi ngemata ke nengeri menua Limbang. Raja besai landik bejaku pandai bejelutai nusi mayuh macham utai ngasuh ngeli rangkai tengkering rang.Remaung Kampung benyawa sagung ngansak nembiak nuju pemansang.

43. Endu Sudan leluyang Bulan, Dara Gembala tekang intan pandai bejaku betipan-tipan, landik ngajat ngelipatka lengan, rejat-rejat niti papan baka duan burung kenyalang. (kedua bali nama Dara Jegit besanggul sintal selit besumping sulat tulang )

44. Angin puting beliung, Lai Nyanggai Menaul Tuntung. Suka Raja Remaung nyawa sagung nyais begerantang. Naga Ai Nabau beratung, ngajung semilu batu pinyang. Raja Ninti ngembuan ati sinu ngenang.

45. Tegung Remaung Dan Suka Raja Rengayan, Nyampi ke menua ili tasik selatan. Mai tandan gelagan bulan tangkai pinang. Raja Gala Gundi bjang berani kempang sinu ati   pemuka kunchi pengerawang lempuang.

46. Ribut Ngesai biau balai. Lang Ngindang Menaul terebai, nyanggai bangkai manuk     menang.Benyawa tila-tila nyaris reranggau nyadungka kitai tangkai lengain nyamai buah     bindang.Selanjat ngembuan kitab dalam lempuang . Selumbing pemutus runding semua kenang.

47. Mas paun tuchi. Dayang ketupang bungai angi berega ke nengeri pasar Simanggang. Dara manis mua baka senaya bulan rumpang.Dara landik lunchik di tunjuk jari butang. 

48. Kunchit Beragum mua menyana selalu ketuchum.Landik bejaku baka tusun ai ambun belayan midang.

49. Dayang Ketupang bungai nanyi, ngembuan bungkan buluh temiang.Dara Gangging  ngembuan ruding bemunyi tetaing di malam petang.

diambi ari: http://www.moe.gov.my/bpk/pNp/jaku_iban/jejuluk/index.htm

Adat Ngayau Bansa Iban Dulu Kelia

Jerita ngayau endang iya amat besai bendar reti ba kitai iban dulu kelia. Nya alai mayuh bansa ari menua bukai ngelar menua kitai Sarawak tu “ Nengeri Pemotong Pala ” tauka “ The Land of the Head Hunters “ .

Tajapan raban bansa iban tebilang serta tampak rita ba sentang pekara ngayau tang raban bansa enda kala mungkal laya dulu enti sema nadai orang dulu ngepun ke laya. Munyi ko ditemu bala mayuh , raban bansa iban endang iya nelap serta bebasa ke raban bansa bukai. Nitih ke jerita tuai kelia , bala raban bansa iban tu semina ngayau lebuh maya ngelaban munsuh maya ti betembung enggau bala munsuh sida. Kebuah alai pia , bansa iban dulu kelia suah amai betukar pendiau , lalu enda netap ba siti-siti tempat (nomad). Maya ti pindah alai diau tu , sida suah bendar tetemu ke bala munsuh ti udu ngerusak pendiau sida , dia alai bala mensia dulu kelia balat bendar bekayau lalu ke pangan diri. Reti ngayau tu , nangkap serta munuh bala munsuh , tang taja pia bala indu enggau bala anak mit deka di bai pulai nyadi ka ulun ba menua bala raban kayau ti menang. 
Kelimpah arinya , bala sida ti udah dikayau tu nadai diperinsa , tang disambut enggau naka pemanah. Sida tu deka disambut ngena adat Iban iya ke diberi nama Gawai Betembang. Nyadi Gawai Betembang tu besai bendar reti , bala sida ti udah dikayau tu tadi lalu diiru nyadi ka ulun tauka ama. Tang taja pia , bala sida tu enda ditaga ke baka ngaga ama. Tang sida dijaga enggau mentas serta siru. Tambah mega , dia bisi siti atur ti nagang bala ulun tu dikangau ke ulun. Iya nya Adat Tusun Tunggu.

Pulai baru ngagai jerita sentang  pala munsuh iya ke udah dibunuh maya ngayau , nyadi ngagai bala sapa lelaki iban ti udah bulih pala munsuh deka digelar Bujang Berani. Nya alai Bujang Berani tu tadi dipebasaka bala raban bukai , laban iya tu jelan bendar rita ba pengelandik  bekayau serta udah ngulih ke pala munsuh lebuh maya ngayau.

Pala munsuh ia ti diulih maya ngayau tu tadi deka disalai lalu disimpan nyadi ke pusaka dalam siti-siti ruang bilik orang ti udah nyadi Bujang Berani. Keruntuk pala munsuh ti udah disalai tu tadi nya dikumbai kitai antu pala. Antu pala tu meri besai bendar reti ngagai bala kitai raban bansa iban. Munyi ko iban dulu kelia , antu pala tu ngembuan pemerani , pemai tuah , enggau pengaya pengeraja ngagai orang ti ngempu nya. Nyadi antu pala tu tadi iya ke suah agi , deka digantung ba dapur , bedilang di luar lalu diangatka ngena unggun api ti mit ia ti digaga ba atas bedilang nya. Kebuah bakanya , nitih ke pengarap iban dulu kelia , antu pala beguna ka pengangat ngambi ka ulih belelak lalu diau enggau senang lantang. Kelimpah arinya , antu pala deka diberi makai , ngirup tuak lalu diusap ngena darah manuk ti baru.

Jerita pasal ngayau tu semina dikembuan bala iban dulu kelia tang taja pia , adat tu enda kala ditinggalka ngapa , tang seruran dikenang awak ka enda punas ditinggal jeman.

Nyadi kena aku nutup karang tu , dulu aku minta ampun enti sema aku bisi salah leka jaku dikena tauka salah sepil. Ngarap ka kitai bala raban bansa iban sama ulih ngemetul ke leka jaku ti udah dikena , awak ka karang tu nyemetak agi dibacha lalu kitai semua mereti ke utai ke bisi dalam karang tu.

Bungai Terung 306

Nuju bala ti bisi ati deka ngembuan baju tu, kita tau nanya enggau silik agi nuju Asst. Project Co-Ordinator Pesaka Pemerindang, Mr Jamain Ambang @ Jay Amin.

Email: pesakapemerindang@yahoo.com  /  jamainambang@yahoo.com.my

Address: Syarikat Pesaka Pemerindang, 15D,2nd Floor, Hock Hui Commercial Centre, Jln Tun Ahmad Zaidi Adruce, 93150 Kuching.

tauka ngena akaun Facebook

http://www.facebook.com/jamain.jay.ambang


Rega: RM 20 selambar.
Tabi basa sereta terima kasih nuju bala mayuh.

Iban: Berani tauka enda kitai berubah?

Keterubah, aku minta ampun enti bisi "grammatical error" dalam karang tu. Idea dalam tu sigi enggi aku kediri , nadai ngari ke sebarang parti politik tauka NGO. Aku minta ampun mega enti jaku aku dalam tu bisi ngerimbas, bisi ngemedis ke ati bala pemacha.

Nyadi, tajuk post aku "Iban: Berani ke enda kitai berubah", reti ya aku nyengkaum semua Dayak di Sarawak, udah nya aku deka nanya nama berani tauka enda kitai berubah? aku ukai bejaku ngenang berubah mimit, ukai, aku deka nanya kitai Dayak, berani enda kitai ngaga "massive leap". Dalam penemu aku empu, "massive leap", dalam reti jaku ti mudah, tu berubah nyau ka 100%, ari segi runding, ekonomi, pengidup, tauka dalam pengawa bukai baka kaul kitai raban bansa tauka enggau bansa bukai. sebedau aku manjai ke agi buah runding aku, aku deka mantai ke chunto (ari baca aku empu) "massive leap" ke udah nyadi kenyau ari dunya tu bepun suba. Chunto keterubah deka dibantai ke aku ianya urang menua Eropah maya sida ngayuh ke pengidup diri (sosial) ari pegai gereja (pemesai menua). Orang Eropah ngasai ke sida enda ulih terus dipegai gereja laban sida enda ulih berundingka pengawa gereja, sida ya ka ngiga saut ngagai tanya dalam pengidup sida, saut ti enda ulih ditanya enti agi dalam pegai gereja. Nyadi sida ya ngaga massive leap, mecah ke diri ari institusi gereja, utai ke udah beratus taun megai runding sida.
Udah sida ya ngaga massive leap, orang Eropah belubah-lubah nemu penerang tauka "Renaissance", sida ya bulih penemu sains, teknologi, sosiologi enggau mayuh agi, nyentukka seharitu, orang Eropah bansa ti pemadu maju di dunya, ketegal sida berani ngaga massive leap.

Mao Ze Dong megai orang China ngaga massive leap, kebuah iya enggai dipegai perintah demokrasi, iya ngagau ke bala bumai, betanam betupi, ngaga "revolusi", keterubah ukai beperang tang "revolusi" dalam runding, nuju "communism", ti bepegai ba kuasa orang mayuh, ti mayuh agi merinsa,agi seranta. Mao mai sida ngelabuh ke perintah demokrasi, ti udah lama megai orang China. Mao madah orang China mesti ninggal ke penemu sereta runding lama ke ngeregau pemansang bansa sida, buku confucius (ti nyadi penenggau pengidup sida beratus-ratus taun) ditunu, bakanya mega buku agama ti bukai. Pemerani Mao diatu udah bebuah, China diatu mansang nyadi negara industri ti pemadu besai di dunya.

Aku enda ngasuh kitai bansa muai gereja, nunu bup kudus, aku empu pan orang sembiang sereta bepanggai ba pengarap, tang bisi siti utai ti patut ditinggalka kitai enti deka mansang baka bansa Eropah tauka bansa Cina, iya nya pengawa ngirup. Tu sigi udah adat munyi ko kitai, tang dalam runding enggau penemu aku, berani enda kitai ngaga massive leap, ninggal ke arak dalam pengidup kitai bansa? berani enda kitai enda ngirup, maya gawai, krismas, gawai antu, mangkung tiang? kebuah aku nanya bakatu laban aku nemu kitai bansa sigi bedau ulih. Orang Eropah sanggup ninggal ke utai ti megai sida beratus-ratus taun (gereja), Mao nunu buku confucius, ngelaban perintah, nama kebuah kitai enda ulih ninggal ke arak? Pengawa tu medis kitai, ba runding aku, nadai utai manah dalam arak. Uji duit ngirup tu disimpan kena nyengula ke anak, uji duit kena meli arak maya pengerami simpan dalam bank, tentu ya nemu beranak, udah nyak ulih dikena mansang ke pengidup. Aku ukai idealist, tentu bisi penanggul enti kitai bansa ninggal ke pengawa tu tang penanggul ti lebih besai agi deka nyadi enti kitai beretan ba pengawa tu. Uji kita nanya saut tu kediri dalam ati. Kala tauka enda kita ninga kitai bansa mabuk, udah nya bebunuh? kala ke enda kita ninga kitai bansa mabuk, udah nyak “sidin” di jalai alun? bansa sapa mayuh di pub? muai beratus-ratus ringgit semalam? sigi amat, enda mabuk pan bebunuh meh enti deka bebunuh, enda mabuk pan enti deka mati, mati meh. Amat. Tang ingat jaku aku tu, kitai bansa sigi majak mati bebunuh, sidin, abis duit enti agi bepengawa baka tu.

Ti ngasuh aku majak alit ati, bakani merinsa enggau seranta pan kitai bansa, tetap meh ulih meli arak, ngaga tuak lebih agi maya pengerami, enggai malu pia ko saut, lapa enda bakatu, "bakani merinsa pan aku, agi meh ulih nyengula ke anak, enggai meh aku malu", lapa enda bakanya deh? laban, kitai bansa enda berani ngaga massive leap ninggal ke arak. Lebih agi ngasuh aku pedis ati, nembiak ngetu sekula pom satu enda dianu, "kapa enda ngiga duit kediri" pia ko kitai. Enti nembiak pom satu belajar ngirup, diasuh keba, "kapa enda ngirup, ila-ila ngirup meh ya", pia ko kitai ga. Udah ga kitai bansa tu entudi orang dalam ngagai pemansang, ditambahka runding bakatu, tambah enggau arak, aku takut ngenang 20 taun ari diatu bakani kitai bansa besemekih penemu enggau pemansang enggau orang.

Bakani kitai ka ngaga massive leap? Aku ukai enda arap ke perintah, aku ukai mega ngutuk, tang sida ya mayuh utai ka dirunding, kitai ngaga massive leap ari ruang bilik, berandau kitai sebilik, meli arak ke enda kitai rami ti deka datai tu? Uji meda gaya bakani duit kitai enti kitai enda meli arak? nambah kini ya? kurang kini ya? ulih ke enda duit nya dibai anak mansang sekula pengudah rami? udah nya kitai berandau serumah, bai buah runding kitai. bakani gaya rumah panjai kitai taun tu nadai arak? duit kena meli arak nyak ulih kena kitai gotong royong kini kena ngaga pengerami bukai, kena kitai besaup meresi rumah panjai. Kena duit pupu rumah panjai. Ni ko kita meh. Enti kitai belubah-lubah ngaga massive leap bepun ari ruang bilik, ngagai rumah panjai, udah nya besai-sebesai agi, kitai tentu meda asil ya, enda entu lama, dua tiga gawai udah berasai mayuh duit disimpan kitai ti patut dikena meli arak.

Aku minta sapa-sapa ke macha tu ngambi ngira belanja arak kena gawai tu tadi. Udah nya enti ulih kira ga gawai enggau pengerami bukai dua tiga taun ti udah. Udah nya berunding nama utai ulih digaga ari duit nya. (ngirup besari-sari nya anang guai dulu ngira, engka nya enda alah kira lagi laban kelalu mayuh). Enti ulih kira mega berapa iku orang kelala kitai parai ketegal arak.

Aram meh kitai ngaga massive leap.
Sebarang tanya tau dituju ngagai bkenneytindin@ymail.com
Terima kasih nuju bala ti udah macha.

Tuju pejalai sereta pengawa ruai tu

Tabi basa,
meri besai terima kasih nuju bala ti udah nyukung aku dalam pengawa nengkebang ruai aku tu, sereta enggau bala kaban ka udah nulung enggau naka ulih, meri buah runding pia mega meri jaku peransang nyentukka ruai tu tembu. tiang udah didirika, gelegar udah dipantang, tikai pan udah dianchau. chukup teguh pelaba aku, semina nganti bala kitai duduk jenuh berandau betunga mua, betimbal leka jaku,bejurai buah penemu.

Ngenang tuju aku ngadu blog tu ianya deka mai kitai nembiak rebak baru meratika adat asal kitai, kenyau ari peturun niang aki enggau ini ichit kitai kelia, awakka pengawa tu enda lenyau, enda putus nyentukka dudi hari. sayau, kaban, tau enda utai bukai, tang adat enggau pengarap tu mesti dikemeran, enda tau ditinggalka, enda tau punas. nadai orang bukai agi enti enda kitai empu.

Laban aku tu ukai mungkal ukai nanjal,
Aku tu endang niti endang nali,
Baka ijok tampung penduk,
Baka rutan tampung danan,
Baka ira tampung lemba,
Baka wi tampung tali.
Pecah periuk tanah ganti periuk tani,
Padam bulan diganti matahari,
Parai orang ka tuai ganti tubuh kami,
Pambu orang ka dulu ganti kitai ka dudi.

 

"bejalai betungkatka adat, tinduk bepanggalka pengingat"

 dikelala daun ari kayu,
 dikelala buah ari langgu,
 dikelala bansa ari jaku,
 dikelala ulah ari penau,
 dikelala basa ari penyiru

"merambu pemerani, pengeransing enggau pengeliat ati nembiak rebak baru bejuraika penemu"